en     km
en     km

ពលរដ្ឋខកចិត្តចំពោះអាជ្ញាធររារាំងមិនឱ្យរំលឹកខួប៣ឆ្នាំ នៃការស្លាប់របស់បណ្ឌិតកែម ឡី

Share

ភ្នំពេញ៖ ប្រជាពលរដ្ឋកម្ពុជាបង្ហាញការខកចិត្តចំពោះវត្តមានរបស់អាជ្ញាធរជាច្រើន ដែលរារាំង មិនឱ្យពួកគាត់មិនឱ្យធ្វើពិធី និងយកកម្រងផ្កាដើម្បីជាការគោរពវិញ្ញាណក្ខ័ន្តលោកបណ្ឌិតកែមឡី នៅកន្លែងដែលឃាតករបាញ់សម្រាប់លោក  ។

រាយការណ៍ដោយដោយ លោក សោម លាភ

ប្រជាពលរដ្ឋជាច្រើន ដែលគោរពស្រឡាញ់វិរៈភាពរបស់លោកបណ្ឌិតកែម ឡី បានបង្ហាញនូវទឹកមុខស្រងូតស្រងាត់ នឹករលឹក និងសោកស្ដាយលោក ក្នុងថ្ងៃគម្រប់ខួប៣ឆ្នាំនៃការបាញ់សម្លាប់ លោកនៅស្តាម៉ាតស្តុបបូកគោ ។ យ៉ាងណា ការចូលរួមរបស់បណ្ដាប្រជាពលរដ្ឋជាច្រើននៅថ្ងៃទី ១០ កក្កដានេះ ធ្វើឡើងក្រោមការត្រួតពិនិត្យរបស់កងកម្លាំងការពារសន្តិសុខជាច្រើន ។ កងកម្លាំងសមត្ថកិច្ច មានការហាមឃាត់មិនឱ្យមានការដាក់បាច់ផ្កានៅលើតុក្នុងស្ដាម៉ាតនោះ ។

លោក រ៉ុង ឈុន មេដឹកនាំសហជីព បានចេញទៅចូលរួមនោះ មានប្រសាសន៍ថា ការហាមឃាត់មិនឱ្យដាក់ផ្កាចំពោះការគោរពដួងវិញ្ញាណរបស់លោក បណ្ឌិតកែម​ ឡី គឺអាក្រក់មើលខ្លាំង និងបង្ហាញថា មិនមានការគោរពសិទ្ធិសេរីភាពរបស់ប្រជាពលរដ្ឋ ។

លោក រ៉ុង ឈុនអំពាវនាវឱ្យអាជ្ញាធរ ត្រូវស្វែងរកយុត្តិធម៌ឱ្យលោកបណ្ឌិតកែម ឡី ក្រុមគ្រួសាររបស់លោក និងអ្នកគោរពស្រឡាញវីរភាពលោក ។

លោក អំ សំអាត ប្រធានគ្រប់គ្រងផ្នែកឃ្លាំមើលសិទ្ធិមនុស្សនៃអង្គការលីកាដូថា អាជ្ញាធរ គួរមានចរចាគ្នា ផ្ដល់ឱកាសបន្តិចដល់ពួកគាត់ទើបជាការល្អ ។

យុវជនម្នាក់ឈ្មោះហេង ហុង ជាអ្នកគោរពស្រឡាញ់លោកបណ្ឌិតកែម ឡី មានប្រសាសន៍ដោយបង្ហាញពីការសោកស្ដាយ និងនឹករលឹកលោកបណ្ឌិតកែម ឡីថា ការបាត់បង់លោកបណ្ឌិតជាការបាត់បង់ធនធានមនុស្សយ៉ាងសំខាន់ ។

ជាងនេះទៅទៀត សកម្មជនអតីតបក្សសង្រ្កោះជាតិនៅតាមបណ្ដាខេត្តមួយចំនួន នៅតាមវត្តអារាម និងនៅទីប្រជុំជនមួយចំនួន បានរំលឹកពីកិត្តិនាមរបស់លោកបណ្ឌិតកែម ឡី ហើយអ្នកខ្លះពាក់អាវយឺតរូបលោកកែមឡី និង ខ្លះទៀតលើករូបថតលោកបណ្ឌិតដោយពួកគេបង្ហោះពាសពេញបណ្ដាញសង្គម ។

ជាងនេះ នៅក្រៅប្រទេសឯណោះវិញ ក៏មានការប្រារព្ធពិធីនេះដែរ ។ លោកសម រង្ស៊ីបានធ្វើពិធីនេះនៅវត្តមួយទីក្រុងប៉ារីសប្រទេសបារាំង ដោយរិះគន់ធ្ងន់ៗចំពោះសម្ដេចនាយករដ្ឋមន្រ្ដីថានៅពីក្រោយឃាតកម្មនេះ ។

 តែយ៉ាងណា សម្ដេចនាយករដ្ឋមន្រ្ដីបានប្ដឹងលោកសមរង្ស៊ីរួចទៅហើយកាលពីឆ្នាំទៅមិញដែលបានចោទសម្ដេចដូចនេះ ។

ដោយឡែក លោកកឹមសុខា ក៏បានបង្ហោះសារអនុស្សាវរីយ៍រវាងលោកនិងរូបលោកកែមឡី និងការទៅគោរពវិញ្ញាណក្ខ័ន្ធលោកកែមឡីនៅស្រុកកំណើតរបស់លោកនៅខេត្តតាកែវ។

លោកបណ្ឌិតកែម ឡី ត្រូវបានឃាតករបាញ់សម្លាប់នៅស្ដាម៉ាតកាល់តិចស្តុបបូកគោ ។

ឃាតករដែលត្រូវបានតុលាការកាត់ទោសអស់មួយជីវិតប៉ុន្ដែមជ្ឈដ្ឋានមួយចំនួនចាត់ទុកថា ជាឃាតករសិប្បនិម្មិត គឺលោកអឿត អាង ហៅជួប សម្លាប់ ។ លោក ជួប សម្លាប់អះអាងថា មូលហេតុនៃការសម្លាប់នោះគឺដោយសារលោកបណ្ឌិតកែម ឡី មិនសងលុយលោកចំនួន ៣ពាន់ដុល្លារ ។

ដោយឡែក ប្រពន្ធរបស់លោកបណ្ឌិតកែម ឡី គឺអ្នកស្រីប៊ូ រចនា បានសរសេរលើទំព័រហ្វេសបុករបស់អ្នកស្រីថា ៣ឆ្នាំកន្លងមកនេះ  អ្នកស្រីបានត្រឹមសម្លឹងមើលលោកបណ្ឌិតកែម ឡីពីចម្ងាយ នឹកបានត្រឹមតែនឹក តែមិនអាចជួប ។

អ្នកស្រីប្រាប់ទៅលោកបណ្ឌិតកែម ឡីថា អ្នកស្រីមានការហួសចិត្តជាខ្លាំងចំពោះអាជ្ញាធរ និងប៉ូលីសដែលបានចុះទៅធ្វើការហាមឃាត់យុវជនឲ្យដោះអាវចេញ ខណៈដែលពួកគេពាក់អាវរូបណ្ឌិតកែម ឡី ។ អ្នកស្រីថា យុវជនដែលពាក់អាវនោះរូបបណ្ឌិតកែម ឡី ធ្វើឲ្យអាជ្ញាធរ ក្តៅក្រហាយ ឈរមិនជាប់ ភ័យខ្លាច និយាយរួមទៅគឺថាខ្លាចលោកបណ្ឌិតកែម ឡីជាខ្លាំង ៕

Share

Image
Image
Image