សៀមរាប៖ អស់រយៈពេល៥ថ្ងៃមកហើយ ដែលបុគ្គលិកមជ្ឈមណ្ឌលម៉ាស្សា អាឡាស្កា បានបន្តតវ៉ា នៅមុខក្រុមហ៊ុន ដើម្បីទាមទារខែសមរម្យ។ តំណាងក្រុមអ្នកតវ៉ាទាំងនោះ បានឱ្យដឹង ថាបើនៅតែគ្មានដំណោះស្រាយ នោះពួកគេនឹងមិនបញ្ឈប់ការធ្វើកូដកម្មនេះឡើយ។ រីឯតំណាងខាងនិយោជកលើកឡើងថា ការតវ៉ារបស់ពួកគេខុសទៅនឹងច្បាប់ការងារ។
នៅថ្ងៃទី០១ ខែធ្នូ ឆ្នាំ២០១៥ នេះ បុគ្គលិកមជ្ឈមណ្ឌលម៉ាស្សាអាឡាស្កា ប្រមាណជាង៧០នាក់ ដែលភាគច្រើនជាស្ត្រី នៅតែបន្តធ្វើការតវ៉ាទាមទារប្រាក់ឈ្នួលគោល និងប្រាក់ទ្រទ្រង់សុខភាព។
អ្នកស្រី គឹម ឡៃ ជាបុគ្គលិកក្នុងមជ្ឈមណ្ឌលម៉ាស្សាអាឡាស្កា ដែលមានថៅកែ ជាជនជាតិកូរ៉េ បានប្រាប់ឱ្យដឹងថា ការតវ៉ារបស់ពួកគេធ្វើឡើងដើម្បីឱ្យមានការរស់នៅសមរម្យតែប៉ុណ្ណោះ។
អ្នកស្រីថា បើនៅតែគ្មានដំណោះស្រាយពីថៅកែក្រុមហ៊ុន លើការទាមទាររបស់ពួកគេទេ ពួកគេនឹងនៅតែបន្តធ្វើកូដកម្មនៅមុខមជ្ឈមណ្ឌល។ អ្នកស្រីបានឱ្យដឹងផងដែរថា កន្លងមក កាលពីទី២៨ ខែវិច្ឆិកា ថៅកែបានឆ្លើយតបមកក្រុមអ្នកតវ៉ា ដោយអះអាងថា នឹងគ្មានការដំឡើងប្រាក់ឈ្នួលតាមការទាមទាររបស់ក្រុមអ្នកតវ៉ាឡើយ។
អ្នកស្រី គឹម ឡៃ បន្ថែមទៀតថា អ្នកស្រីបម្រើការងារក្នុងមជ្ឈមណ្ឌលម៉ាស្សានេះ ជិត ៧ ឆ្នាំហើយ ប៉ុន្តែទទួលបានប្រាក់ឈ្នួលគោលតែ ៧០ ដុល្លារប៉ុណ្ណោះក្នុងមួយខែ។ អ្នកស្រី គឹម ឡៃ បានឱ្យទៀតថា ប្រាក់ឈ្នួលគោលចន្លោះពី ៥៥ ដុល្លារ ដល់ ៧០ ដុល្លារនេះ ពួកគេមិនអាចទទួលយកបាននោះទេ ដោយសារតម្លៃទំនិញនៅលើទីផ្សារ ទឹក ភ្លើង និងថ្លៃឈ្នួលផ្ទះ សុទ្ធតែឡើងថ្លៃ។
អ្នកស្រីបញ្ជាក់បន្ថែម៖«ទាមទារហ្នឹង មិនទាមទារយកទាំងអស់ទេ ទាមទារឱ្យថៅកែហ្នឹងមានដោះណោះស្រាយ ឬក៏ឡើងឱ្យគាត់តិចតួច គាត់មិនបានទាមទារដូចនៅក្នុងក្រដាសទេ វាគ្រាន់តែជាក្រដាសមួយសម្រាប់ដែលយើងដាក់តថ្លៃគ្នា»។
អ្នកបកប្រែភាសាកូរ៉េ ប្រចាំមជ្ឈមណ្ឌលម៉ាស្សាអាឡាស្កា លោក គឹម យ៉ុងអ៊ីល បានប្រាប់វិទ្យុស្ត្រីនៃ WMC នៅថ្ងៃនេះថា ការទាមទាររបស់ក្រុមអ្នកតវ៉ាទាំងនោះ គឺខុសទៅច្បាប់ការងារ។ លោកថា ការទាមទាររបស់ពួកគេ មិនមានចែងនៅក្នុងច្បាប់ ការងារ នោះទេ។ លោកបានឱ្យដឹងដែរថា មជ្ឈមណ្ឌលនឹងមិនដោះស្រាយ ឬចរចាជាមួយ អ្នកតវ៉ា ទាំងនោះឡើយ ព្រោះអ្នកដែលតវ៉ាទាមទារនោះ មានចំនួនតិច ហើយបុគ្គលមួយចំនួនធំ កំពុងធ្វើការ៖ «ចំណុចទាំងពីរនេះបានឆ្លងកាត់ក្រុមប្រឹក្សាអាជ្ញាកណ្តាលនៅក្រសួងការងារហើយ ក្រសួងការងារគេបានបដិសេធហើយ … បុគ្គលិកវិស័យសេវាកម្ម អត់មានប្រាក់ឈ្នួលគោលទេ»។
ជុំវិញបញ្ហានេះដែរ លោក ស មូរ៉ា ប្រធានសហព័ន្ធសហជីពកម្មករចំណីអាហារ និងសេវាកម្ម មានប្រសាសន៍ថា ការតវ៉ារបស់កម្មករ មិនបានខុសទៅនឹងនីតិវិធីច្បាប់ ដូចដែលការឡើងរបស់អ្នកបកប្រែភាសាកូរ៉េនោះឡើយ។ លោកថា កម្មករបានធ្វើការទាមទារតាំងពីខែកុម្ភៈមកម្ល៉េះ ហើយការតវ៉ានេះ ក៏មិនមានការរារាំងពីអាជ្ញាធរខេត្តសៀមរាបផងដែរ ដោយសារគេយល់ថា នេះជាការតវ៉ាស្របតាមច្បាប់។
លោកមានប្រសាសន៍ទៀតថា៖ «អាហ្នឹងជាការលើកឡើងរបស់ក្រុមហ៊ុន បើយើងនិយាយទៅប្រហែលគាត់ជាជនជាតិកូរ៉េ ហើយគាត់មិនបានស្គាល់ច្បាប់ស្រុកខ្មែរយើងឱ្យបានស៊ីជម្រៅ ឬក៏មានអ្នកទៅបកប្រែច្បាប់ឱ្យគាត់ហ្នឹងវាខុស វាអាចជាបញ្ហាហ្នឹងដែរ»។
លោក ស មូរ៉ា បានឱ្យដឹងបន្តថា រហូតដល់ពេលនេះ មិនទាន់មានដំណោះស្រាយពីថៅកែមជ្ឈមណ្ឌលនោះទេ បើទោះបីជាមានការសម្របសម្រួលពីអាជ្ញាធរខេត្តសៀមរាបពីរដងរួចមកហើយក៏ដោយ។
សូមជម្រាបថា នេះជាថ្ងៃទី៥ ហើយ ដែលបុគ្គលិកក្នុងមជ្ឈមណ្ឌលម៉ាស្សាអាឡាស្កា សិ្ថតក្រុងសៀមរាប ខេត្តសៀមរាប បានចេញតវ៉ាទាមទារដំឡើងប្រាក់ឈ្នួលគោល១៧៧ ដុល្លារក្នុងមួយខែ និងប្រាក់ទ្រទ្រង់សុខភាពចំនួន១០០ដុល្លារក្នុងមួយឆ្នាំ៕
