ភ្នំពេញ៖ គណបក្សសង្គ្រោះជាតិ បានសម្រេចបញ្ចូនតំណាងរាស្ដ្ររបស់ខ្លួន៤រួប ទៅចូលរួមប្រជុំគណៈកម្មាធិការអចិន្ដ្រៃយ៍រដ្ឋសភានៅព្រឹកថ្ងៃពុធនេះ ដែលមានរបៀបវារៈ នៃកិច្ចប្រជុំចំនួន៥។
តាមអ្នករាយការណ៍ព័ត៌មានរបស់វិទ្យុស្ដ្រី តំណាងរាស្ដ្រ៤រូប នៃគណបក្សប្រឆាំង ដែលចូលប្រជុំសភា មានលោក អេង ឆៃអ៊ាង ប្រធានគណៈកម្មាធិការ ទទួលបន្ទុកផ្នែកសិទ្ធិមនុស្ស លោក យ៉ែម បុញ្ញាឬទ្ធិ ប្រធានគណៈកម្មាធិការ ទទួលបន្ទុកកិច្ចការអប់រំនិងវប្បធម៌ លោក ប៉ុល ហំម ប្រធានគណៈកម្មាធិការ ទទួលបន្ទុកបរិស្ថាន និងលោក ហូរ វ៉ាន់ ប្រធានគណៈកម្មាធិការប្រឆាំងអំពើពុករលួយ។
តាមសេចក្ដីជូនដំណឹងរបស់អគ្គលេខាធិការដ្ឋានរដ្ឋសភា កិច្ចប្រជុំគណៈកម្មាធិការអចិន្ដ្រៃយ៍ រដ្ឋសភានៅថ្ងៃនេះ មានរបៀបវារៈសំខាន់ចំនួន៥ ប៉ុន្ដែរបៀបវារៈដែលមានការចាប់អារម្មណ៍ជាងគេ គឺ ការពិនិត្យសេចក្ដីសម្រេច ស្ដីពីការអនុវត្តចំពោះតំណាងរាស្ដ្រ ហើយរបៀបវារៈមួយទៀត ស្ដីពីការពិនិត្យសំណើសុំអនុម័តនូវសេចក្ដីព្រាងច្បាប់ ស្ដីពី ហិរញ្ញវត្ថុ
សម្រាប់ការគ្រប់គ្រងឆ្នាំ២០១៧។
តែយ៉ាងនេះក្ដី វត្តមានរបស់ប្រធានគណៈកម្មាធិការ ជំនាញ៤រូបមកពីគណបក្សសង្គ្រោះជាតិ ពេលនេះ ធ្វើឡើងបន្ទាប់ពីបក្សប្រឆាំងធំនេះ បានសម្រេចមិនចូលប្រជុំសភា នៅពេលដែល សភាចាប់ផ្ដើមចូលធ្វើការវិញ កាលពីថ្ងៃទី៧ ខែកញ្ញា ឆ្នាំ២០១៦៕
