ភ្នំពេញ៖ ប្រជាពលរដ្ឋដែលមានទំនាស់ដីធ្លីមកពីខេត្ដកោះកុងទទូចសុំឲ្យក្រសួងរៀបចំដែនដីនិងប្រមុខរដ្ឋាភិបាលពន្លឿនការដោះស្រាយបញ្ហាដីធ្លីជូនពួកគាត់ឲ្យបានឆាប់ពីព្រោះពេលនេះមានយុវតីម្នាក់របស់អ្នកភូមិត្រូវរងហិង្សារំលោភសម្លាប់។
អ្នកភូមិអះអាងថា ព្រោះដំណោះស្រាយចេះតែអួសបន្លាយទើបបណ្ដាលឲ្យមានករណីរំលោភសម្លាប់នេះកើតឡើង។ តែករណីនេះក្រសួងឲ្យដឹងថា មិនអាចយករឿងក្រុមគ្រួសារ មកពាក់ព័ន្ធរឿងទំនាស់ដីធ្លីបានទេ។ ប្រជាពលរដ្ឋមកពីស្រុកស្រែអំបិល ខេត្ដកោះកុង បាននិយាយថា រឿងរ៉ាវរបស់ពួកគាត់កាន់តែស្មុគស្មាញថែមទៀត ដោយមិនត្រឹមតែធ្វើឲ្យពលរដ្ឋរងគ្រោះឃ្លាតឆ្ងាយផ្ទះសម្បែងប៉ុណ្ណោះទេ ប៉ុន្ដែថែមទាំងបណ្ដាលឲ្យយុវតីវ័យ ១៤ឆ្នាំម្នាក់រងការរំលោភហើយសម្លាប់ថែមទៀតខណៈអាណាព្យា បាលមកតវ៉ានៅរាជធានីភ្នំពេញ។
ថ្លែងទាំងទឹកភ្នែកអ្នកស្រី ផាវ ញ៉ឺង តំណាងពលរដ្ឋបានប្រាប់អ្នកសារព័ត៌មានថា ព្រោះទំនាស់ដីធ្លីដែលគ្មានចម្លើយទើបបណ្ដាលឲ្យយុវតី ត្រូវជនល្មើសរំលោភសម្លាប់ដូចនេះ។ អ្នកស្រីសុំឲ្យក្រសួងរៀបចំដែនដី និងប្រមុខរដ្ឋាភិបាលធ្វើយ៉ាងណាជួយដោះស្រាយរឿងនេះឲ្យបានឆាប់ដើម្បីពលរដ្ឋអាចវិលទៅមើលថែកូនចៅនៅស្រុកវិញ។ អ្នកស្រី ផាវ ញ៉ឺង ៖«ជាការសោកស្ដាយណាស់ដែលពួកយើងទៅរកឃើ ញសាកសពនោះ ត្រូវបានឃាតករជាពូបង្កើត ចាប់រំលោភ ការដែលយើងមកតវ៉ានៅទីនេះយើងជឿ ជាក់ថា នឹងមានដំណោះ ស្រាយយ៉ាងឆាប់បំផុត ប៉ុន្ដែយើងហាក់មានទុក្ខជាន់លើទុក្ខ យើងសុំរដ្ឋាភិបាលជួលពន្លឿនដោះស្រាយរឿងនេះឲ្យបានឆាប់បំផុត»។
ដូចគ្នាដែរអ្នកស្រី នុម វណ្ណារី មានប្រសាសន៍ថា ប្រសិនបើរដ្ឋាភិបាលគោរពសិទ្ធិមនុស្ស សិទ្ធិស្ដ្រីនិងសិទ្ធិកុមារ គឺត្រូវតែដោះស្រាយបញ្ហាជូនពួកគាត់ឲ្យបានឆាប់ ដើម្បីកុំឲ្យពួកគាត់ក្លាយជាជនរងគ្រោះព្រោះរឿងដីធ្លីមួយជាន់ហើយ នៅរងគ្រោះព្រោះការបាត់បង់សមាជិកគ្រួសារមួយជាន់ទៀត។ បន្ថែមពីនេះអ្នកស្រី បន្ដថា ក្រុមអ្នកស្រីមិនអាចត្រឡប់ទៅវិញទាំងគ្មានដីដើម្បីធ្វើកសិកម្មចិញ្ចឹមជីវិតបានទេ មិនថាត្រូវគេវាយទាត់ធាក់ ធ្វើបាបយ៉ាងណាទេ ក៏ក្រុមអ្នកស្រីទាំងអស់មិនទៅវិញជាដាច់ខាត។ អ្នកស្រី នុម វណ្ណារី ៖«ពួកយើងសព្វថ្ងៃនេះ ដែលនៅតវ៉ានៅរាជធានីភ្នំពេញអត់ស្ដាយអាយុជីវិតទេ ទោះបីគេវ៉ៃគេទាត់គេធាក់យ៉ាងណាក៏ដោយពួកយើងវាធ្លាប់ហើយ នៅមូលដ្ឋានក៏គេវ៉ៃក៏គេទាត់គេធាក់រកចោទដាក់ទោសព្រហ្មទណ្ឌដូចគ្នា»។
ចំណែកស្ដ្រីវ័យជាង ៦០ឆ្នាំម្នាក់ទៀត រូបរាងស្គមស្គាំង អ្នកស្រី សួង រីន មានប្រសាសន៍ថា អ្នកស្រីមកភ្នំពេញតវ៉ានេះពីព្រោះតែវាជាជម្រើសចុងក្រោយសម្រាប់អ្នកស្រីក៏ដូចជាអ្នកភូមិស្រុកស្រែអំបិល។ អ្នកស្រីបញ្ជាក់ថា តាំងពីបាត់បង់ដីស្រែចម្ការគ្រួសារអ្នកស្រីជួបការលំបាកជាច្រើនជុំវិញការចំណាយ ព្រោះអ្នកស្រីនិងស្វាមីមានវ័យចាស់ណាស់ទៅហើយ។ អ្នកស្រី សួង រីន ៖«វេទនាណាស់នៅទីនេះ អ៊ុំមិនចង់នៅទេប៉ុន្ដែដំណោះស្រាយវាយរ៉ាំរ៉ៃពេក កាលណាវាដោះស្រាយបញ្ហាចប់ អ៊ុំទៅផ្ទះវិញហើយអ៊ុំមិននៅទេឲ្យតែមានសំណងលុយដីចម្ការនឹងហើយហើយផ្ទះសម្បែរហើយអ៊ុំទៅវិញហើយព្រោះវាលំបាកណាស់»។
យ៉ាងណាក្រុមប្រជាពលរដ្ឋមកពីខេត្ដកោះកុងដែលភាគច្រើនសុទ្ធសឹងតែជាស្ដ្រីមានទាំងកុមារផងបានប្ដេជ្ញាថា ប្រសិនក្នុងរង្វង់សប្ដាហ៍នេះគ្មានចំលើយជាក់លាក់ពីក្រសួង ពួកគាត់នឹងទៅតវ៉ានៅមុខផ្ទះសម្ដេចនាយករដ្ឋមន្ដ្រី ហ៊ុន សែន។
ជាការឆ្លើយតបអនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក ទេព ធន មានសាសន៍ថា ការធ្វើសន្និសីទឬក៏ទៅតវ៉ានៅទីណាជាសិទ្ធិរបស់ពលរដ្ឋ។ លោកបន្ថែមថា ចំពោះករណីមានអំពើរំលោភសម្លាប់នេះមិនអាចយកមកដាក់បន្ទុកលើទំនាស់ដីធ្លីនេះទេ។ លោកសង្កត់ធ្ងន់ថា រាល់កិច្ចការទាំងអស់គឺត្រូវដោះស្រាយដោយឈរលើគោលការណ៍ច្បាប់ ហើយក្នុងដំណាក់កាលនេះភាគីក្រុមហ៊ុនក៏មិនទាន់ផ្ដល់ចម្លើយមកក្រសួងវិញទេ ព្រោះត្រូវរង់ចាំថ្ងៃប្រជុំនាចុងខែកុម្ភៈ នេះជាមុនសិន។ លោក ទេព ធន ៖«ទេអត់ទេ កុំយកបញ្ហាមកផ្អោប រឿងហ្នឹងជារឿងផ្ទាល់ខ្លួន (ករណីរំលោភសម្លាប់យុវតីវ័យ១៤ឆ្នាំខេត្ដកោះកុង) ក្រុមគ្រួសារនិងសង្គមតើ មានអ្វីទាក់ទងនឹងរឿងដីធ្លី អារឿងដោះដោះហើយតែគេមិនទាន់បានប្រជុំពិភាក្សាគ្នាសម្រេចផងឲ្យធ្វើម៉េច»។
គួរម្លឹកថា បញ្ហាទំនាស់ដីធ្លីរវាងពលរដ្ឋស្រុកស្រែអំបិល ខេត្ដកោះកុង ជាមួយក្រុមហ៊ុនឧកញ៉ា លី យ៉ុងផាត់ និងក្រុមហ៊ុន ហេង ហ៊ុយ នេះ កើតឡើងជាយូរឆ្នាំមកហើយពោល គឺតាំងតែពីឆ្នាំ ២០០៦មកម្លេះ។ បើគិតមកដល់ពេលនេះមានរយៈពេល១០ឆ្នាំហើយ។ ក្រោយមានទំនាស់ដីធ្លីពលរដ្ឋខេត្ដកោះកុង បានដាក់ញត្តិរកកិច្ចអន្តរាគមន៍ពីក្រសួងពាក់ព័ន្ធជាច្រើន ក៏ប៉ុន្តែដោយសារតែគ្មានការឆ្លើយតប ទើបក្រុមអ្នកភូមិសម្រេចចិត្ដទ្បើងមករាជធានីភ្នំពេញ ដើម្បីស្វែងរកអន្តរាគមន៍ពីក្រសួងមានសមត្ថកិច្ចដូចនេះ៕
