ភ្នំពេញ៖ តុលាការកំពូលនៅព្រឹកថ្ងៃទី ១៧សីហា បានបដិសេធបណ្ដឹងសុំនៅក្រៅឃុំរបស់លោក អ៊ុំ សំអាន អ្នកតំណាងរាស្ដ្រគណបក្សសង្គ្រោះជាតិ ដែលត្រូវបានចាប់ឃុំខ្លួនក្រោមបទចោទបង្ហោះផែនទីក្លែងក្លាយ ពាក់ព័ន្ធរឿងព្រំដែនជាមួយប្រទេសវៀតណាម។
ការប្រកាសសាលដីការបស់តុលាការកំពូលធ្វើឡើងនៅចំពោះមុខមេធាវីលោក អ៊ុំ សំអាន ប៉ុន្ដែចុងចោទអវត្ដមាន មិនត្រូវបានសមត្ថកិច្ចនាំខ្លួនមកស្ដាប់ សាលដីកានេះទេ។
លោកមេធាវីការពារក្ដីឲ្យលោក អ៊ុំ សំអាន គឺ លោក ហែម សុជាតិ បានប្រាប់អ្នកសារព័ត៌មានថា តុលាការកំពូល មិនគួរបដិសេធបណ្ដឹងនេះទេ ព្រោះកូនក្ដីរបស់លោក មានហេតុផលនិងសំអាងត្រឹមត្រូវ ទើបសុំនៅក្រៅឃុំ ។
លោក ហែម សុជាតិ សម្ដែងការខកចិត្ដ។ សាលដីការបស់តុលាការកំពូលបានប្រកាសតម្កល់ទុក សេចក្ដីសម្រេចរបស់សាលាឧទ្ធរណ៍ដែលមិនអនុញ្ញាតិឲ្យលោក អ៊ុំ សំអាន បាននៅក្រៅឃុំ។
កាលពីសប្ដាហ៍មុន នៅពេលសមត្ថកិច្ចនាំខ្លួនលោកមកកាន់តុលាការ លោក អ៊ុំ សំអាន អ្នកតំណាងរាស្ដ្រគណបក្សសង្គ្រោះជាតិមណ្ឌលសៀមរាប បានស្រែកប្រាប់អ្នកសារព័ត៌មានថា ការចាប់ខ្លួន គឺជាការធ្វើរដ្ឋប្រហាររដ្ឋធម្មនុញ្ញត្រង់មាត្រា ៨០ និយាយអំពីអភ័យឯកសិទ្ធិសមាជិកសភា។ លោកបានចោទគណបក្សប្រជាជនកម្ពុជាថា ចាប់អ្នកស្នេហាជាតិដាក់គុក ដោយសារតែបញ្ហាជម្លោះព្រំដែនជាមួយប្រទេសវៀតណាម ។
តែបែបនេះក្ដីអ្នកនាំពាក្យគណបក្សកាន់អំណាចចាត់ទុកលោក អ៊ុំ សំអាន ថាមានបញ្ហាសតិអារម្មណ៍។ គួររម្លឹកថា លោក អ៊ុំ សំអាន ត្រូវបានចាប់ខ្លួនកាលពីថ្ងៃទី ១០មេសា ឆ្នាំ ២០១៥ គឺភ្លាមៗបន្ទាប់ពីលោកចុះពីលើយន្ដហោះមកពីសហរដ្ឋអាមេរិក គឺចាប់ខ្លួនលោកនៅកណ្ដាលយប់ ៕
