ភ្នំពេញ៖ សាលាដំបូងរាជធានីភ្នំពេញបានបើសវនាការពិនិត្យលើការអនុវត្តទោសលោក គឹម សុខ ដើម្បីពិចារណាថាតើត្រូវដោះលែង ឬបន្ដឃុំខ្លួន ដែលសវនាការនឹងធ្វើឡើងនៅរសៀលថ្ងៃទី១៤ ខែសីហា ឆ្នាំ២០១៨ នេះ ។
លោក គឹម សុខ ត្រូវបាននាំខ្លួនមកដល់សាលាដំបូងរាជធានីភ្នំពេញ នៅម៉ោង១៖ ៤០នាទីរសៀល ថ្ងៃទី១៤ ខែសីហាឆ្នាំ២០១៨នេះ ។
មកដល់ពេលនេះ សវនាការរឿងលោក គឹម សុខ មិនទាន់បានបញ្ចប់នៅឡើយទេ។
បញ្ជាក់ផងដែរថា លោក គឹម សុខ ដែលសាធារណជនមួយចំនួនហៅថា «អ្នកវិភាគសង្គម» កាលពីរសៀលថ្ងៃទី១០ ខែសីហា ឆ្នាំ២០១៧ ត្រូវបានចៅក្រមជំនុំជម្រះសាលាដំបូងរាជធានីភ្នំពេញ លោក គី ប្ញទ្ធី សម្រេចផ្ដន្ទាទោសដាក់ពន្ធនាគារចំនួន ១៨ខែ និងពិន័យប្រាក់ចំនួន៨លានរៀល រួមនឹងប្រាក់សងជំងឺចិត្តដល់ដើម បណ្តឹង៨០០លានរៀល ក្រោមការចោទប្រកាន់ពីបទញុះញង់ឲ្យមានបទឧក្រិដ្ឋជាអាទិ៍។ លោកត្រូវបាននាំទៅឃុំខ្លួន ភ្លាមៗនៅពន្ធនាគារព្រៃស នៅថ្ងៃទី១៧កុម្ភៈ បន្ទាប់ពីលោកចូលខ្លួន តាមដីកាកោះ របស់តុលាការករណី លោកចោទបក្សកាន់អំណាចនៅពីក្រោយឃាតកម្មលើ លោក បណ្ឌិតកែមឡី។
ការផ្តន្ទាទោសនេះ ធ្វើឡើងបន្ទាប់ពីមានពាក្យបណ្ដឹងពីគណបក្សប្រជាជនកម្ពុជា ថា លោក គឹម សុខបានធ្វើអោយប៉ះពាល់ធ្ងន់ធ្ងរដល់កិត្តិស័ព្ទ និងភាពស្អាតស្អំ របស់គណបក្សប្រជាជនកម្ពុជា និងថាអ្នកវិភាគរូបនេះ មានចេតនាទុច្ចរិតញុះញង់ បំផុសបំផុល បញ្ឆេះកំហឹងមហាជនដែលអាចកើតមានអំពើចលាចលធ្ងន់ធ្ងរដល់សណ្ដាប់ធ្នាប់សាធារណៈសន្ដិសុខសង្គមទាំងមូល។
សូមជម្រាបផងដែរថា លោក គឹម សុខ អ្នកវិភាគដែល និយាយមិនចេះខ្លាចញញើត នៅមានជាប់ពាក្យបណ្ដឹងមួយទៀត ដែលប្តឹងដោយលោក គី តិច មេធាវីរបសសម្តេច ហ៊ុន សែន ពាក់ព័ន្ធករណី ថា រាជរដ្ឋាភិបាលកម្ពុជាបានបង្កើតប្រព័ន្ធសម្លាប់មនុស្ស ប៉ុន្តែរកឃាតកមិនដែលឃើញ។
នៅថ្ងៃទី១៧សីហា ឆ្នាំ២០១៨នេះ គឺពេលវេលាគម្រប់ ១៨ខែ ដែល លោក គឹម សុខ ត្រូវឃុំខ្លួននៅពន្ធនាគារព្រៃសរតាមសាលក្រមរបស់តុលាការ៕
៕