ចិនស៊ិនហ៊ ៖ សារព័ត៌មានរបស់ប្រទេសចិន បានចុះផ្សាយថា អាជ្ញាធររបស់ប្រទេសនេះបានចាប់ផ្ដើមធ្វើយុទ្ធនាការជូនដំណឹងដល់ ពលរដ្ឋរបស់ខ្លួនរស់នៅតាមព្រំដែនជាមួយកូរ៉េខាងជើងឲ្យមានការប្រុងប្រយ័ត្នខ្ពស់បំផុត ឬក៏ត្រូវរត់រកតំបន់សុវត្ថិភាព បើករណីសង្គ្រាមឧបទ្វីបកូរ៉េផ្ទុះឡើង។
សារព័ត៌មានចិន បានចុះផ្សាយទៀតថា យុទ្ធនាការនៃការប្រាប់ទៅពលរដ្ឋចិននេះ គឺដើម្បីឲ្យចេះការពារខ្លួន និង រត់រកទីសុវត្ថិភាព ដោយត្រូវបិទទ្វារផ្ទះ ប្រសិនបើមានការវាយប្រហារណាមួយផ្ទុះឡើងនៅតាមតំបន់ព្រំដែន ដែលកាសែតចិនជាច្រើនបានចុះផ្សាយថា វាជាភ្លើងសង្គ្រាមលើឧបទ្វីបកូរ៉េ។
ការពីថ្ងៃម្សិលមិញ ចិន បានធ្វើសមយុទ្ធយោធានៅតាមព្រំដែនជាប់កូរ៉េខាងជើង ដែលសមយុទ្ធនេះ ដើម្បីឆ្លើយតបការវាយលុកណាមួយពីកងទ័ពកូរ៉េខាងជើង ឬក៏កងទ័ពម្ខាងទៀតដែលមានជម្លោះជាមួយនិងកូរ៉េខាងជើងនោះ។ កាសែត ប៉េកាំង ញូយ៍ បានចុះផ្សាយថា អភិបាលខេត្ដតាមព្រំដែនទាំងអស់បានទទួលការណែនាំទាំងនេះ អស់ហើយពីរដ្ឋាភិបាលក្រុងប៉េកាំង ដោយប្រាប់ឲ្យមានការប្រុងប្រ័ត្នគ្រប់ស្ថានភាពទាំងអស់។
សហរដ្ឋអាមេរិកនិងកូរ៉េខាងត្បូង កំពុងដឹកនាំការធ្វើសមយុទ្ធយោធាទ្រង់ទ្រាយធំ ដោយមានយន្ដហោះចម្បាំងទំនើបៗនៃប្រទេសទាំងពីរ ចំនួន ២៦០គ្រឿង។ សមយុទ្ធដ៏ធំត្រូវបានកូរ៉េខាងជើងអះអាងថា ជាការចាប់ផ្ដើមផ្ទុះសង្គ្រាមលើឧបទ្វីបកូរ៉េរួចទៅហើយ៕
