ភ្នំពេញ៖ គ្រោះអគ្គិភ័យដែលកើតឡើងក្នុងរាជធានីភ្នំពេញ នាឆ្នាំ២០១៧នេះ គឺថយចុះជាងកាលពីឆ្នាំ២០១៦ ដែលភាគច្រើន នៃដើមហេតុបង្កឡើងពីការឆ្លងចរន្ដអគ្គិសនី។ គ្រោះអគ្គិភ័យឆ្នាំនេះ បានកើតឡើងចំនួន ៨៤លើក បណ្ដាលឲ្យស្ដ្រីម្នាក់ និងបុរស ៦នាក់ស្លាប់បាត់បងជីវិត ខណៈអ្នករងរបួសចំនួន ១១នាក់ មានស្ដ្រី ៤នាក់។
លោក លៀ ស៊ីណា រាយការណ៍៖
លោក ព្រហ្ម យ៉ន នាយការិយាល័យ បង្ការ និងពន្លត់អគ្គីភ័យរាជធានីភ្នំពេញ បានប្រាប់វិទ្យុស្ដ្រីថា ករណីគ្រោះអគ្គិភ័យនៅក្នុងរាជធានីភ្នំពេញ សម្រាប់ឆ្នាំ២០១៧នេះ ត្រូវបានកត់សម្គាល់ឃើញថា បានថយចុះជាងកាលពីឆ្នាំ២០១៦ ក៏ប៉ុន្ដែចំនួនអ្នកស្លាប់ក្នុងឆ្នាំនេះ បានកើតឡើង។ កាលពីឆ្នាំ២០១៦ គ្រោះអគ្គិភ័យបានកើតឡើងចំនួន ៨៦លើក បណ្ដាលឲ្យមនុស្ស ៤ស្លាប់ និងមនុស្សចំនួន ១៩នាក់រងរបួស។
បន្ថែលើនេះ នាយការិយាល័យ បង្ការ និងពន្លត់អគ្គីភ័យរាជធានីភ្នំពេញ បន្ដថា គ្រោះអគ្គិភ័យនៅក្នុងឆ្នាំ២០១៧នេះ ភាគច្រើនគឺបណ្ដាលមកពីការឆ្លងចរន្ដអគ្គិសនី។ តែលោកអះអាងថា ពលរដ្ឋមានការយល់ដឹង និងប្រុងប្រយ័ត្នច្រើនជុំវិញការបង្ការ គ្រោះអគ្គិភ័យ ទើបចំនួន នៃគ្រោះអគ្គិភ័យក្នុងឆ្នាំ២០១៧នេះ ថយចុះជាងកាលពីឆ្នាំ២០១៦។
លោក ព្រហ្ម យ៉ន ៖«ការថយចុះមកពីប្រជាពលរដ្ឋមានការប្រុងប្រយ័ត្នច្រើន អញ្ចឹងវាធ្វើឲ្យគ្រោះអគ្គិភ័យវាកាត់បន្ថយច្រើន។ អញ្ចឹងក្នុងមួយឆ្នាំៗ យើងជឿជាក់ថា អាចថយ ដោយពួកយើងតែងតែចុះផ្សព្វផ្សាយតាមលំនៅឋានរបស់ពួកគាត់ ឲ្យគាត់មានការយកចិត្ដទុកដាក់ ក្នុងការប្រើប្រាស់សារធាតុមួយចំនួន ដែលអាចងាយរងគ្រោះដោយសារអគ្គិភ័យ ក៏ដូចជាការប្រើប្រាស់ថាមពលចរន្ដអគ្គិសនីផងដែរ»។
គ្រោះអគ្គិភ័យបានកើតឡើងទៅលើខណ្ឌមួយចំនួន មានដូចជា ខណ្ឌពោធិសែនជ័យ ខណ្ឌសែនសុខ ខណ្ឌដូនពេញ ខណ្ឌចំការមន ខណ្ឌដង្កោ ខណ្ឌមានជ័យ ខណ្ឌទូលគោក ខណ្ឌឬស្សីកែវ ខណ្ឌច្បារអំពៅ និងខណ្ឌ ៧មករា។ ទន្ទឹមនឹងនេះលោក ព្រហ្ម យ៉ន សំណូមពរដល់ប្រជាពលរដ្ឋឲ្យមានការប្រុងប្រយ័ត្នខ្ពស់ទៅលើការប្រើប្រាស់ភ្លើងទៀន ភ្លើងចង្ក្រាន ក៏ដូចជា ការប្រើប្រាស់ចរន្ដអគ្គិសនី និងសារធាតុឆេះមួយចំនួន។
លោក ព្រហ្ម យ៉ន ៖«ទាក់ទិនរឿងហ្នឹង គឺឲ្យគាត់ជួយខ្លួនឯង បានន័យថា គាត់ត្រូវមានឧបករណ៍ពន្លត់អគ្គិភ័យនៅតាមលំនៅឋានរបស់ពួកគាត់ មានរៀងៗខ្លួន នៅពេលមានករណីអគ្គិភ័យតូចតាចកើតឡើងយើងអាចយកទៅប្រើប្រាស់ជួយពួកគាត់បាន»។
គួរជម្រាបថា គ្រោះអគ្គិភ័យនៅទូទាំងប្រទេសក្នុងឆ្នាំ២០១៧នេះ បានកើតឡើងចំនួន ៥១៤លើក បណ្ដាលឲ្យមនុស្សស្លាប់ចំនួន ២២នាក់ និងរងរបួសចំនួន ១២នាក់។ យោងតាមតួលេខនៃគ្រោះអគ្គិភ័យក្នុងឆ្នាំ២០១៧នេះ ឃើញថា មានការថយចុះចំនួន ៩៨ករណី បើធៀបទៅនឹងឆ្នាំ២០១៦៕