ភ្នំពេញ៖លោក ស៊ាង ចែត មេឃុំមកពីគណបក្ស សម រង្ស៊ី បានអំពាវនាវសុំអោយលោក កឹម សុខា និង លោក សម រង្ស៊ី រួបរួមគ្នានិងស្រឡាញ់គ្នាមុននិងធ្វើកិច្ចការអ្វីមួយ។
ការលើកឡើងរបស់លោក ស៊ាង ចែត ដូចនេះធ្វើឡើងបន្ទាប់ពីលោកត្រូវបានដោះលែងចេញពីពន្ធធនាគារព្រៃសរនៅព្រឹកថ្ងៃទី០៨ ខែធ្នូ ឆ្នាំ២០១៦នេះ។
លោក ស៊ាង ចែត បានអំពាវនាវទៅកាន់លោក កឹម សុខា និងលោក សម រង្ស៊ី ដូចនេះ ៖«ហើយខ្ញុំក៏សូមផ្ដាំផ្ញើទៅអោយលោកប្រធាន និងអនុប្រធានអោយចេះរួបរួមគ្នា ស្រឡាញ់គ្នា រឿងរ៉ាវអ្វីដែលលើកឡើងមកនេះ ទោះបីជាលោកប្រធាននៅក្រៅ អនុប្រធាននៅក្នុង»។
បន្ថែមពីលើការអំពាវនាវលោក ស៊ាង ចែត មេឃុំស្រុកកំពង់សៀមខេត្តកំពង់ចាមរូបនេះក៏បានអះអាងថា លោកមិនស្ដាយក្រោយចំពោះអ្វីដែលខ្លួនបានធ្វើន្លងមកដើម្បីជាតិនោះឡើយ។
លោក ស៊ាង ចែត ៖«ខ្ញុំអត់តូចចិត្តទេ ខ្ញុំមានការសប្បាយចិត្ត ទោះបីជាប្រាំឆ្នាំក៏ដោយ ក៏ខ្ញុំនៅទ្រាំនិងពន្ធធនាគារដែរ ធ្វើម៉េចអោយតែជាតិ និងឱ្យប្រជាពលរដ្ឋខ្មែរគាត់សប្បាយ កុំអោយបក្សតែបក្សទាំងពីរបែកបាក់គ្នា ឈ្លោះគ្នា »។
លោក ស៊ាង ចែត ត្រូវបានដោះលែងឱ្យមានសេរីភាពឡើងវិញនៅថ្ងៃនេះ បន្ទាប់ពីមានព្រះរាជក្រឹត្យលើកលែងទោសពីព្រះមហាក្សត្រតាមសំណើសម្ដេចនាយករដ្ឋមន្ដ្រី ហ៊ុន សែន កាលពីរសៀលថ្ងៃទី០៧ ខែធ្នូ ឆ្នាំ២០១៦។
ការចេញព្រះរាជក្រឹត្យលើកលែងទោសលោក មេឃុំ ស៊ាង ចែត នេះដែរគឺធ្វើឡើងក្នុងថ្ងៃតែមួយក្រោយបញ្ចប់កិច្ចជំនួបពិភាក្សារវាងលោក កឹម សុខា ជាមួយសម្ដេចនាយករដ្ឋមន្ដ្រីហ៊ុនសែន និងសម្ដេច ស ខេងរដ្ឋមន្ដ្រីក្រសួងមហាផ្ទៃនៅវិមានរដ្ឋសភា។
គួររម្លឹកដែរថាលោក ស៊ាង ចែត មេឃុំស្រុកកំពង់សៀមខេត្តកំពង់ចាមមកពីគណបក្ស សម រង្ស៊ី ត្រូវបានអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី២៤ ខែមេសា ឆ្នាំ២០១៦ តាមចម្លើយដែលអះអាងក្នុងលិខិតចំហររបស់អ្នកនាង ខុម ចាន់តារាទី ហៅស្រីមុំ ថាបានយកប្រាក់ ៥០០ដុល្លារ ទៅឱ្យម្ដាយរបស់នាងដើម្បីឱ្យគាត់ជួយប្រាប់រូបនាងកុំឱ្យនិយាយការពិតប្រាប់សមត្ថកិច្ចអំពីទំនាក់ទំនរវាងនាងនិងលោក កឹម សុខា។
អ្នកឃ្លាំមើលការអភិវឌ្ឍនិងនយោបាយលោក គឹម សុខ បានលើកឡើងថា ការអំពាវនាវរបស់មេឃុំ ស៊ាង ចែត នៅពេលនេះ ជាការត្រឹមត្រួវមួយ ព្រោះនេះក៏ជាព្រួយបារម្ភមួយរបស់ពលរដ្ឋទូទៅផងដែរ។លោក គឹម សុខ យល់ថា លោក ស៊ាង ចែត យល់ អំពីស្ថានការណ៍នយោបាយ។
លោក គឹម សុខ «និយាយអោយចំការសម្ដែងមតិរបស់លោកមេឃុំស៊ាង ចែតហ្នឹង គឺជាការបង្ហាញ ទស្សនៈទូទៅរបស់ពលរដ្ឋម្ចាស់ឆ្នោត និងសកម្មជនគណបក្សសង្គ្រោះជាតិ បារម្ភអំពីការបែកគ្នារបស់លោក សម រង្ស៊ី និងលោក កឹម សុខា ហើយដឹងច្បាស់ថា ក្នុងកាលៈទេសៈណា ប្រសិនបើអ្នកទាំងពីរនៅតែរួមគ្នា គឺ នៅតែខ្លាំង និងមានសង្ឃឹម »។
ទាក់ទិននឹងរឿងនេះដែរលោក សម រង្ស៊ី ប្រធានគណបក្សសង្គ្រោះជាតិកាលពីថ្ងៃម្សិលមិញនេះបញ្ជាក់ប្រាប់ ប្រជាពលរដ្ឋនិងអ្នកគាំទ្រគណបក្សរបស់លោកឱ្យតាំងស្មារតីរឹងមាំ និងបន្ដការជឿទុកចិត្តលើការសាមគ្គីភាពនិងការចាប់ដៃគ្នារវាងលោកជាមួយលោកកឹម សុខា អនុប្រធានគណបក្សសង្គ្រោះជាតិ ក្នុងការដឹកនាំនាវាសង្គ្រោះជាតិឆ្ពោះទៅរកការដឹកនាំប្រទេសនាំមកនូវការផ្លាស់ប្ដូរជាវិជ្ជមាននៅថ្ងៃខាងមុខ៕