ភ្នំពេញ ៖ ថ្លែងក្នុងពិធិសម្ពោធជាផ្លូវការនូវក្រុមហ៊ុន INTERNATIONAL EASY REACH CO.,LTD នៅថ្ងៃទី១៩ ខែវិច្ឆិកា តំណាងក្រុមហ៊ុននេះបញ្ជាក់ថា កំពុងត្រៀមបញ្ជូនពលការិនីចំនួន ៣រូបបន្ថែមទៀត ទៅបម្រើការងារជាជំនួយការមេផ្ទះនៅទីក្រុងហុងកុង។ លោករដ្ឋមន្ដ្រីក្រសួងការងារ ប្រាប់ឲ្យក្រុមហ៊ុននេះ ត្រូវយកចិត្ដទុកដាក់ឲ្យបានខ្ពស់ក្នុងការធានាសុវត្ថិភាពពលពលការិនី និងលក្ខខណ្ឌការងារ។
លោក លៀ ស៊ីណា ជូនសេចក្ដីរាយការណ៍ ៖
តំណាងក្រុហ៊ុន INTERNATIONAL EASY REACH CO.,LTD លោកស្រី យី ឆេង បានថ្លែងក្នុងពិធីនេះថា ក្រុមហ៊ុននឹងខិតខំបណ្ដុះពលការិនីឲ្យមានសមត្ថភាព ដែលអាចទៅធ្វើការងារនៅទីក្រុងហុងបាន ស្របតាមទិសដៅក្រសួងការងារ ដែលធ្វើយ៉ាងណាបញ្ជូនពលការិនីទៅកាន់ទីក្រុងហុងកុង ឲ្យបានយ៉ាងហោចណាស់ ១០០០នាក់ក្នុងមួយឆ្នាំ។
លោកស្រី យី ឆេង បន្ដថា សព្វថ្ងៃនេះក្រុមហ៊ុនលោកស្រីបាននឹងកំពុងតែបន្ដផ្សព្វផ្សាយក្នុងការជ្រើសរើសកម្មការិនី ដើម្បីយកមកបណ្ដុះបណ្ដាល ត្រៀមបញ្ជូនទៅទីក្រុងហុង។ លោកស្រីបន្ដថា បច្ចុប្បន្នេះក្រុមហ៊ុន កំពុងតែបណ្ដុះបណ្ដាលពលការិនីចំនួន ១៣រូប ដែលនឹងបញ្ចប់វគ្គក្នុងពេលដ៏ខ្លីខាងមុខនេះ ស្របពេលដែលមានកម្មការិនីចំនួន ៣រូប បានជាប់កិច្ចសន្យាធ្វើការងារនៅទីក្រុងហុងកុង ៖«មានដៃគូនៅហុងកុង បានចុះហត្ថលេខាជាមួយក្រុមហ៊ុនរូចរាល់ ដោយរង់ចាំការអនុញ្ញាតរបស់ក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសម្របសម្រួលនាំពលករទៅហុងកុង»។
ទាក់ទិនករណីនេះលោក អ៊ិត សំហេង រដ្ឋមន្ដ្រីក្រសួងការងារ មានប្រសាសន៍ក្នុងពិធីនេះ ដោយស្នើដល់ក្រុមហ៊ុនមួយនេះ ត្រូវបន្ដការយកចិត្ដទុកដាក់ ខិតខំប្រឹងប្រែងបន្ថែមទៀត ដើម្បីធ្វើយ៉ាងណាសម្របសម្រួលនាំចេញពលករទៅកាន់ទីក្រុងហុង ប្រកបដោយជោគជ័យ ដោយគោរពតាមបទប្បញ្ញត្ដិច្បាប់ជាធរមាន ដើម្បីធានានូវសុវត្ថិភាព ផាសុខភាព ភាពត្រឹមត្រូវ និង សេចក្ដីថ្លៃថ្នូ។ ជាងនេះ ក្រុមហ៊ុនត្រូវ តែធានានូវលក្ខខណ្ឌការងារឲ្យកាន់តែល្អឡើង ជូនដល់កម្មការិនីកម្ពុជា ដែលនឹងចេញទៅបម្រើការងារជាជំនួយការមេផ្ទះនៅទីក្រុងហុងកុង នាងពេលខាងឆាប់ៗខាងមុខ។
លោករដ្ឋមន្ដ្រីអះអាង រដ្ឋាភិបាលអាណត្ដិទី៦នេះ បាននឹងកំពុងខិតខំបន្ថែមទៀតក្នុងការរឹតចំណងទាក់ទងទ្វេភាគីជាអន្ដរជាតិ ដើម្បីធ្វើយ៉ាងណាបើកឲ្យកាន់តែទូលាយនូវទីផ្សារការងារស្របច្បាប់នៅក្រៅប្រទេស និងទប់ស្កាត់ទេសសន្ដរប្រវេសន៍ការងារក្រៅប្រទេសដោយខុសច្បាប់។
កម្ពុជា បានបញ្ជូនពលការិនីចំនួន ១៤នាក់ ទៅធ្វើជាជំនួយការតាមផ្ទះនៅកាន់ទីក្រុងហុងកុង ជាលើកដំបូងកាលពីចុងឆ្នាំ២០១៧។ បើសិនដូចការគ្រោងទុករបស់ក្រុមហ៊ុន INTERNATIONAL EASY REACH CO.,LTD ដែលត្រៀមបញ្ជូនពលការិនីទៅបន្ថែមទៀត នេះគឺជាលើកទី២ហើយ សម្រាប់ការបញ្ជូនកម្មការិនីទៅទីក្រុងហុងកុង។
លោក អ៊ិត សំហេង បានបញ្ជាក់ថា សព្វថ្ងៃនៅទីក្រុងហុងកុងមានពលករបរទេស បម្រើការងារតាមផ្ទះ មានចំនួនប្រហែល ៣៥៧ ០០០នាក់ ភាគច្រើនជាជនជាតិហ្វីលីពីន និងឥណ្ឌូនេស៊ី ដោយពួកគេទទួលបានសិទ្ធិ និងលក្ខខណ្ឌការងារដូចពលករហុងកុងដែរ។ សិទ្ធិទាំងនោះរួមមាន - ការឈប់សម្រាកប្រចាំសប្តាហ៍ - ការឈប់សម្រាកប្រចាំឆ្នាំ ដោយមានប្រាក់ឈ្នួល ចំនួន៧ ថ្ងៃ ទៅ១៤ថ្ងៃ ក្នុង១ឆ្នាំ - ការឈប់សម្រាកលំហែមាតុភាព ចំនួន១០សប្តាហ៍ - ការធានារ៉ាប់រងពេលមានជំងឺ - ផ្តល់បន្ថែមប្រាក់លើកទឹកចិត្តសម្រាប់ពលករដែលបម្រើការងារយូរឆ្នាំ។
បន្ថែមពីលើនេះលោកថា រដ្ឋាភិបាលនៃតំបន់រដ្ឋបាលពិសេសហុងកុង បានដាក់ឲ្យមាននូវកិច្ចសន្យាការងារស្តង់ដាសម្រាប់គាំពារបន្ថែមជូនដល់ពលករបរទេសបម្រើ ការងារតាមផ្ទះ រួមមានប្រាក់បៀវត្សទាបបំផុតត្រឹម ប្រមាណ៥៧០ដុល្លារអាមេរិក ដែលនឹងត្រូវត្រួតពិនិត្យឡើងវិញជាទៀងទាត់ ការផ្តល់អាហារ ឬប្រាក់ហូបចុកចំនួន ១៣៣ដុល្លារអាមេរិក ក្នុង១ខែ ការស្នាក់នៅសមរម្យដោយមិនគិតថ្លៃ ការចេញថ្លៃសំបុត្រយន្តហោះត្រឡប់មកវិញ និងការព្យាបាលជំងឺដោយមិនគិតថ្លៃជាដើម។
គួរបញ្ជាក់ថា បច្ចុប្បន្នប្រទេសកម្ពុជាបានបញ្ជូនពលករទៅបម្រើការងារនៅបរទេសបានចំនួន៦ប្រទេស គឺ ប្រទេសថៃ សាធារណរដ្ឋកូរ៉េ ម៉ាឡេស៊ី ជប៉ុន សឹង្ហបូរី និងហុងកុង ដែលមានពលករសរុបចំនួនប្រមាណ ១លាន ២សែននាក់។ កន្លងមកពួកគាត់បានផ្ញើថវិកាមកកម្ពុជា ដើម្បីជួយទ្រទ្រង់ជីវភាពក្រុមគ្រួសាររបស់ពួកគាត់ ប្រមាណជាង ២ពាន់លានដុល្លារក្នុង១ឆ្នាំៗ។ នៅពេលបញ្ចប់កិច្ចសន្យាការងារ និងវិលត្រឡប់មកកម្ពុជាវិញ ពួកគាត់នឹងក្លាយជាធនធានមនុស្សដ៏សំខាន់ក្នុងការចូលរួមអភិវឌ្ឍសេដ្ឋកិច្ចជាតិ ពីព្រោះតាមរយៈ ការធ្វើការងារនៅបរទេស ពួកគាត់មិនត្រឹមតែអាចរកប្រាក់ចំណូលបានបន្ថែមទេ ថែមទាំងទាំងទទួលបាននូវជំនាញ បទពិសោធន៍ ចំណេះដឹងភាសា និងរបៀបរបបរស់នៅក្នុងប្រទេសអភិវឌ្ឍន៍ទៀតផង៕
