លោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទ បានតែងតាំងមន្ត្រី ៥ រូប ឱ្យតាមដានមតិរបស់សាធារណជនលើទំព័រហ្វេសប៊ុក (Facebook) របស់សម្តេចនាយករដ្ឋមន្ត្រី ហ៊ុន សែន ដែលមានពាក់ព័ន្ធនឹងវិស័យអភិវឌ្ឍន៍ជនបទ។
ការចាត់តាំងមន្ត្រី ៥ រូបនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានចេញសេចក្តីណែនាំដល់មន្ត្រីរបស់ខ្លួនឱ្យចាត់តាំងក្រុមការងារតាមដានរបាយការណ៍ប្រចាំថ្ងៃ និងសំណូមពររបស់ប្រជាពលរដ្ឋនៅលើទំព័រហ្វេសប៊ុករបស់លោក កាលពីម្សិលមិញ ដោយលោកចាត់ទុកថា នេះដើម្បីដោះស្រាយបញ្ហាជូនពលរដ្ឋទាន់ពេលវេលា។
យោងតាមសេចក្តីសម្រេចរបស់លោក ជា សុផារ៉ា រដ្ឋមន្ត្រីក្រសួងអភិវឌ្ឍន៍ជនបទដែលបានចុះហត្ថលេខា នៅថ្ងៃទី០៩ ខែកុម្ភៈ ឆ្នាំ២០១៦ នេះ បានឱ្យដឹងថា មន្ត្រីទាំង ៥រូប ដែលចាត់តាំងឱ្យចាំតាមដានសកម្មភាពរបស់មហាជននេះរួមមាន៖ ១. លោក សួស គង់ រដ្ឋលេខាធិការ, ២. លោក ទូច ស៊ីផាត ប្រធានការិយាល័យស្រាវជ្រាវ, ៣. កញ្ញា នូសុវត្ថិ ចាន់វត្តី មន្ត្រីខុទ្ទកាល័យ ,៤. កញ្ញា ហែម សុហ្វីយ៉ា អនុប្រធានការិយាល័យសម្ភារៈ, និង៥. កញ្ញា ច័ន្ទ សូរិយា អនុប្រធានការិយាល័យកិច្ចការទូទៅ។