ភ្នំពេញ៖ ក្រសួងអប់រំ យុវជន និងកីឡា បានចេញសេចក្ដីជូនដំណឹងមួយ ស្ដីពីការប្រឡងជ្រើសរើសគ្រូបង្រៀនកម្រិតមូលដ្ឋាន បង្រៀននៅអនុវិទ្យាល័យ (១២+២) ដោយក្រសួងត្រូវការជ្រើសរើស ៦០០នាក់ រយៈពេលបណ្ដុះបណ្ដាល ២ឆ្នាំ។
ពាក្យប្រឡងគ្រូបង្រៀនកម្រិតមូលដ្ឋាននៅអនុវិទ្យាល័យចំនួន ៦០០នាក់នេះ នឹងចាប់ផ្ដើមទទួលពាក្យពីថ្ងៃជូនដំណឹងនេះ រហូតដល់ថ្ងៃទី២៧ ខែកញ្ញា ឆ្នាំ២០១៧ ។ ហើយការប្រឡងនឹងប្រព្រឹត្តិទៅនៅថ្ងៃទី២៧ ខែតុលា ឆ្នាំ២០១៧ នៅមជ្ឈមណ្ឌលគរុកោសល្យភូមិភាគរាជធានីភ្នំពេញ ,ខេត្តកណ្ដាល, កំពង់ចាម ,បាត់ដំបង, ព្រៃវែង និងតាកែវ។
សម្រាប់បេក្ខជនដែលបានជ្រើសរើស មុខវិជ្ជាឯកទេសភាសាបារាំង-គណិតវិទ្យា ភាសាបារាំង-រូបវិទ្យា ភាសាបារាំង-ជីវវិទ្យា ក្សេត្រសាស្ដ្រ-បសុវប្បកម្ម និងរោងជាង-អគ្គិសនី ត្រូវប្រឡងនៅមជ្ឈមណ្ឌលគរុកោសល្យ ភូមិភាគរាជធានីភ្នំពេញ។
លក្ខខណ្ឌជ្រើសរើស ៖
១.ជាសិស្សសុទ្ធសាធ មានសញ្ជាតិខ្មែរ មានជីវប្រវត្តិច្បាស់លាស់ មានសុខភាព និងកាយសម្បទានល្អ មិនទាន់មានការងារក្នុងក្របខ័ណ្ឌរដ្ឋ។ ហើយបេក្ខជនទាំងពីរភេទត្រូវមានសញ្ញាបត្រចាប់ពីមធ្យមសិក្សាទុតិយភូមិចំណេះទូទៅ ឬសញ្ញាបត្រដែលមានតម្លៃសមមូលឡើងទៅ ឬសញ្ញាបត្របច្ចេកទេសវិជ្ជាជីវៈកម្រិត ៣ មានអាយុពី១៦ ដល់ ២៥ឆ្នាំ គិតដល់ថ្ងៃទី២៧ខែតុលាឆ្នាំ២០១៧។
២.ជាគ្រូបឋមសិក្សា និងគ្រូមត្តេយ្យសិក្សា ដែលបានតែងតាំងស៊ប់ក្នុងក្របខណ្ឌ ហើយមានសញ្ញាបត្រមធ្យមសិក្សាទុតិយភូមិចំណេះទូទៅ ឬសញ្ញាបត្រដែលមានតម្លៃសមមូលឡើងទៅ។
៣.ជាគ្រូបឋមសិក្សា និងគ្រូមតេ្តយ្យសិក្សាដែលមានសញ្ញាបត្រមធ្យមសិក្សាបឋមភូមិចំណេះទូទៅ ឬជាគ្រូបឋមសិក្សា និងគ្រូមតេ្តយ្យសិក្សា ដែលបានបំពេញរូបមន្ដ (៧+១) ហើយធ្លាប់បម្រើការងារ ៥ឆ្នាំយ៉ាងតិច។
តាមរយៈសេចក្ដីជូនដំណឹងរបស់ក្រសួងអប់រំដដែល គឺ រយៈពេលបណ្ដុះបណ្ដាល នឹងចាប់ផ្ដើមពីថ្ងៃទី១៥ ខែវិច្ឆិកា ឆ្នាំ២០១៧ នៅមជ្ឈមណ្ឌលគរុកោសល្យភូមិភាគទាំង៦ ។ ព័ត៌មានបន្ថែមសូមចូលទៅកាន់គេហទំព័រ៖ www.moeys.gov.kh ុ
ទាញយកឯកសារ ៖ https://goo.gl/dHhUwK ៕
