ភ្នំពេញ៖សម្ដេចនាយករដ្ឋមន្ដ្រីហ៊ុន សែន នៅថ្ងៃពុធ ទី២២ ខែមិនា នេះ បានធ្វើការបែងចែកអាជ្ញាធរថ្នាក់ជាតិមួយចំនួនទៅអោយរដ្ឋមន្ដ្រី ក្រសួងវប្បធម៌គ្រប់គ្រងដូចជាអាជ្ញាធរអប្សារា និងអាជ្ញាធរព្រះវិហារ ដែលស្ថាប័ន ២នេះ ធ្លាប់គ្រប់គ្រងដោយឧបនាយក រដ្ឋមន្ដ្រី សុខ អាន ។
ការថ្លែងរបស់សម្ដេច ហ៊ុន សែន ធ្វើឡើងនៅក្នុងពិធីប្រគល់សញ្ញាបត្រដល់និស្សិតគរុកោសល្យ នៅវិទ្យាស្ថានជាតិអប់រំ កាលពីព្រឹកមិញនេះ។
ក្នុងឱកាសនេះ សម្ដេចបានបញ្ជាក់ថា ត្រូវចាំបាច់ដាក់អាជ្ញាធរអប្សារា និងអាជ្ញាធរព្រះវិហារ នៅក្រោមការគ្រប់គ្រងរបស់ក្រសួងវប្បធម៌ ព្រោះស្ថាប័នថ្នាក់ជាតិទាំង ២នេះ មានង្សាវតា ជាមួយក្រសួងវប្បធម៌ ។
ប៉ុន្ដែការបញ្ជាក់របស់សម្ដេចនាយករដ្ឋមន្ដ្រី ធ្វើឡើងស្របពេលដែលសម្ដេចរិះគន់ទៅលើអ្នកនាំពាក្យគណៈរដ្ឋមន្ដ្រីគឺលោក ផៃ ស៊ីផានថា ការ បកស្រាយមួយចំនួនមិនមានភាពត្រឹមត្រូវចំពោះតួនាទីរបស់សម្ដេច សុខ អាន ដែលត្រូវប្រគល់ទៅអោយលោកឧបនាយករដ្ឋមន្ត្រី ប៊ិន ឈិន។
តាមប្រសាសន៍របស់ សម្ដេចហ៊ុន សែន លោក ប៊ិន ឈិន នឹងទទួលខុសត្រូវកិច្ចការសហប្រតិបត្តិការជាមួយ អង្គការសហប្រជាជាតិ ទាក់ទិនរឿងកិច្ចការរបស់ សាលាក្ដីខ្មែរក្រហម ៕
