ភ្នំពេញ៖ ក្រសួងការបរទេសសហរដ្ឋអាមេរិកបានអំពាវនាវឲ្យប្រទេសកម្ពុជា ចៀសវាងអំពើហិង្សា និងការគំរាមកំហែងផ្នែកនយោបាយនៅពេលដែលការឃោសនាបោះឆ្នោតថ្នាក់មូលដ្ឋានចាប់ផ្តើម។

លោកស្រី អាលីស្យា អេដវើដស៍ ( Alicia Edwards) អ្នកនាំពាក្យមួយរូប របស់ក្រសួងការបរទេសសហរដ្ឋអាមេរិក បាននិយាយក្នុងសេចក្តីថ្លែងការណ៍នៅថ្ងៃសៅរ៍នេះថា «សហរដ្ឋអាមេរិកទទូចឲ្យរាជរដ្ឋាភិបាលកម្ពុជាធានា ដល់លំហនយោបាយដែលគ្មានការគំរាមកំហែងនិងគ្មានការបំបាក់ស្មារតី» និងធានាដល់ការគោរពសេរីភាពនៃការបញ្ចេញមតិរបស់ប្រជាពលរដ្ឋកម្ពុជា។
សម្តេចនាយករដ្ឋមន្ត្រី ហ៊ុន សែន បានកាន់កាប់អំណាចបីទសវត្ស និងបានព្រមានពីការផ្ទុះសង្គ្រាមស៊ីវិលប្រសិនបើគណបក្សប្រជាជនកម្ពុជារបស់សម្តេចចាញ់ឆ្នោតនោះ។
កាលពីពេលថ្មីៗនេះ លោករដ្ឋមន្ត្រីក្រសួងការពារជាតិ ទៀ បាញ់ បានព្រមានថាលោកនឹងវាយបំបាក់ធ្មេញជនណាដែលហ៊ានប្រឆាំងនឹងជ័យជំនះរបស់គណបក្សប្រជាជនកម្ពុជា៕