ភ្នំពេញ ៖ ប្រជាពលរដ្ឋខ្មែរ ២១នាក់ត្រូវបានស្ថានឯកអគ្គរាជទូតកម្ពុជាប្រចាំនៅក្រៅប្រទេសបានជួនអន្ដរាគមន៍ ឲ្យបានវិលត្រឡប់មកកម្ពុជាវិញ។ ក្នុងចំណោមពលរដ្ឋខ្មែរទាំងនេះ ក៏មានកុមារផងដែរ។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជាដែលផ្សព្វផ្សាយកាលពីថ្ងៃទី២២ ខែមិថុនា ម្សិលមិញ។
ក្រសួងការបរទេសឲ្យដឹងថា ស្ថានឯកអគ្គរាជទូតកម្ពុជាប្រចាំប្រទេសសឹង្ហបូរី បានជួយអន្ដរាគមន៍នាំស្ដ្រីខ្មែរចំនួន ០២នាក់ មានស្រុកកំណើតនៅខេត្ដកំពង់ចាម និងខេត្ដកំពង់ឆ្នាំ ឲ្យបានវិលមកដល់កម្ពុជាវិញជាបន្ដបន្ទាប់ចន្លោះពីថ្ងៃទី០៨ ដល់ថ្ងៃទី២១ ខែមិថុនា ឆ្នាំ២០១៨។ ស្ដ្រីខ្មែរទាំងពីររូបនោះ បានទៅដល់ប្រទេសសិង្ហបូរី ដើម្បីធ្វើការជាជំនួយការមេផ្ទះ ព្រោះតែការងារលំបាក់ខ្លាំងទើបពួកគាត់សម្រេចចិត្ដ ទាមទារវិលមកវិញ។
ចំណែកស្ថានឯកអគ្គរាជទូតកម្ពុជាប្រចាំប្រទេស ម៉ាឡេស៊ី បានជួយអន្ដរាគមន៍នាំពលរដ្ឋខ្មែរចំនួន ១២នាក់ ដែលមានស្រុកកំណើតនៅខេត្ដកំពត ខេត្ដកណ្ដាល កំពង់ធំ កំពង់ចាម ត្បូងឃ្មុំ ពោធិ៍សាត់ ព្រះវិហារ និងរាជធានីភ្នំពេញ ឲ្យបានវិលមកកម្ពុជាវិញជាបន្ដបន្ទាប់ ចន្លោះថ្ងៃទី០៣ ដល់ថ្ងៃទី១៧ ខែមិថុនា ឆ្នាំ២០១៨។ ក្នុងចំណោមពលរដ្ឋខ្មែរទាំង ១២នាក់នេះ មានស្ដ្រី ០៧នាក់ និងកុមារចំនួន ០៣នាក់។ ពួកគេបានទៅដល់ប្រទេសម៉ាឡេស៊ី ស្នាក់នៅ និងធ្វើការដោយខុសច្បាប់។
ជាមួយគ្នានេះ ស្ថានអគ្គកុងស៊ុលកម្ពុជាប្រចាំទីក្រុងសៀងហៃ ប្រទេសចិន ក៏បានជួយអន្ដរាគមន៍ជួយស្ដ្រីខ្មែរចំនួន ០៧នាក់ មានស្រុកកំណើតនៅខេត្ដកណ្ដាល កំពង់ចាម តាកែវ បាត់ដំបង ពោធិ៍សាត់ ព្រៃវែង និងខេត្ដស្វាយរៀង ឲ្យបានវិលត្រឡប់មកប្រទេសកម្ពុជាវិញ កាលពីថ្ងៃទី២២ ខែមិថុនា ឆ្នាំ២០១៨។ ពួកគេទាំង ០៧នាក់នេះ បានចាញ់បោកមេខ្យល់ នាំទៅប្រទេសចិនកាលពីខែធ្នូ ឆ្នាំ២០១៣៕