ភ្នំពេញៈយោងតាមរបាយការណ៍ប្រចាំឆ្នាំរបស់កំពង់ផែស្វយ័តក្រុងព្រះសីហនុរកប្រាក់ចំណូលសរុបសម្រាប់ឆ្នាំ២០១៧គឺ ជិត៥៧លានដុល្លារកើនឡើងជិត៩ភាគរយ។
ក្នុងរបាយការណ៍ប្រចាំឆ្នាំ២០១៧របស់កំពង់ផែស្វយ័តក្រុងព្រះសីហនុបានបង្ហាញថាកំពង់ផែស្វយ័តនេះរកប្រាក់ចំណូលកើនឡើងជាងឆ្នាំមុន។ប្រាក់ចំណូលសរុបជិត៥៧ល្លានដុល្លារស្មើនឹង៨.៨១ភាគរយ បើធៀបទៅនឹងឆ្នាំ២០១៦ មានចំនួនជាង៤លាន ៦ សែន ដុល្លារ។
ចំណែកប្រាក់ចំណេញសុទ្ធក្រោយបង់ពន្ធសរុបមានចំនួនជាង ៦ លានដុល្លារ ដែលប្រាក់ចំណេញសុទ្ធនេះមានការថយចុះជិត៤លានដុល្លារ ស្មើនឹង ៥,៩២ ភាគរយ បើធៀបទៅនឹងឆ្នាំ២០១៦។ប្រាក់ចំណេញសុទ្ធនេះដោយសារពីអត្រាប្តូរប្រាក់យ៉េនមានការថយចុះ។
គិតត្រឹមខែ ធ្នូ ឆ្នាំ ២០១៧ ទ្រព្យសកម្មសរុបនៃកំពង់ផែស្វយ័តក្រុងព្រះសីហនុមានចំនួនជាង៣២០ល្លានដុល្លារ កើនចំនួនជាង៤៩ លានដុល្លារស្មើនឹង ១៨.២៤%។
មូលធនសរុប មានចំនួនជិត១៦១លានដុល្លារ កើនឡើងចំនួនជាង២៨លានដុល្លារស្មើនឹង ២០.៩៥% ។
បើតាមរបាយការណ៍កំពង់ផែស្វយ័តក្រុងព្រះសីហនុឲ្យដឹងថាក្នុងឆ្នាំ ២០១៧ កុតតឺន័រឆ្លងកាត់ក្រុងព្រះសីហនុមានចំនួនជាង ៤ សែន ៥ ពាន់គ្រឿង។ពោលគឺកើនឡើងជិត៦ម៉ឺនគ្រឿង ស្មើនឹង ១៤,៩១ភាគរយ បើធៀបទៅនឹងឆ្នាំមុន។ ផលចំណេញក្នុងមួយឯកតាមូលបត្រកម្មសិទ្ធចំនួនជិត៣៣០រៀល៕
