ភ្នំពេញ៖ តំណាងកម្មកររោងចក្រ វីន ស៊ីងតិច ថា នឹងដង្ហែរក្បួនដាក់ញត្តិមកទីស្តីការគណៈរដ្ឋមន្ត្រីប្រសិនបើនៅតែមិនមានដំណោះស្រាយពីថៅកែរោងចក្រ កណីដែលពួកគេចោទថាថៅកែរោងចក្រនេះ បានរំលាយកិច្ចសន្យាកម្មករនិយោជិតមុនពេលកំណត់។
ការលើកទ្បើងបែបនេះបន្ទាប់ពីតំណាងក្រុមកម្មករបានធ្វើការចចារជាមួយតំណាងក្រុមហ៊ុន វីន ស៊ីងតិច នៅព្រឹកថ្ងៃទី២២ ខែមីនា ឆ្នាំ២០១៦ នេះ។
តំណាងសហជីពស៊ីខៅឌូ (C.CAWDU) លោក ប៉ាល់ មករា បានប្រាប់វិទ្យុស្ត្រីនៅថ្ងៃនេះថា តំណាងកម្មករ និយោជិត បានជួបកិច្ចពិភាក្សាជាមួយតំណាងក្រុមកម្មករ វីន ស៊ីងតិច ជុំវិញការទាមទារប្រាក់សំណងដែលថៅកែក្រុមហ៊ុនរំលាយកិច្ចសន្យាកម្មករ និយោជិតមុនពេលកំណត់។ លោកថាជាលទ្ធផលនៃការចរចា ថ្ងៃទី២២ ខែមីនា ២០១៦ គឺមិនត្រូវរ៉ូវគ្នានោះទេដោយ មេធាវីផ្ដល់តែប្រាក់សំណង ៥០% រីឯភាគីខាងកម្មករមិនព្រម ទើបស្នើទូទាត់តាមច្បាប់ ១០០%។
លោក ប៉ាល់ មករា ៖«ហើយឥឡូវពួកគាត់ស្អែកនៅរង់ចាំបន្តិចទៀតនៅចុងក្រោយហ្នឹងខាងគណៈកម្មការប្រធានហ្នឹងគាត់ស្នើឱ្យខាងមេធាវីហ្នឹងយកអាសំណើសារថ្មីទៅពិភាក្សាសារជាថ្មីម្តងទៀត ព្រោះរឿងហ្នឹងជារឿងរបស់កម្មករ ហើយបន្ទាប់នឹងបើល្ងាចនឹង ឬស្អែកព្រលឹមទ្បើងពុំមានវិធានការនោះទេគឺ យើងហែរញត្តិទៅស្តីការគណៈរដ្ឋមន្ត្រីហ្មងយើងអត់ចូលក្រសួងទេ»។
ពាក់ព័ន្ធនឹងករណីនេះដែរ អគ្គលេខាធិការរងនៃគណៈកម្មការសម្រាប់ដោះស្រាយកូដកម្ម បាតុកម្ម និងគ្រប់មុខសញ្ញានៃក្រសួងការងារ លោក វង្ស សុវណ្ណ មានប្រសាសន៍ថាលទ្ធផលនៃកិច្ចចចារកាលពីព្រឹកមិញនេះ លទ្ធផលនៅមានកម្រិតនៅទ្បើយ។ លោក បន្តថាបើទោះបីជាការចរចានោះពុំទាន់បានលទ្ធផលល្អប្រសើរក៏ដោយ ប៉ុន្តែលោកនឹងខិតខំបន្តធ្វើការផ្សះផ្សាភាគីទាំងពីរឱ្យទទួលបានការឯកភាពគ្នាទ្បើងវិញស្របទៅតាមផ្លូវច្បាប់។
លោក វង្ស សុវណ្ណ៖ «ក្នុងនាមគណៈកម្មការដោះស្រាយ កូដកម្ម បាតុកម្ម ដែលឯកឧត្តមបណ្ឌិត អ៊ិត សំហេង លោកជាប្រធានជារដ្ឋមន្ត្រីក្រសួងការងារផងយើងនៅតែខិតខំធ្វើម៉េចទាញភាគីទាំងពីរហ្នឹងជំរុញឱ្យពិភាក្សាគ្នាធ្វើម៉េចរកលទ្ធផលឱ្យបានល្អ ហើយនឹងឆាប់រហ័សជូនបងប្អូនយើង»។
សូមជម្រាបថា កាលពីថ្ងៃម្សិលមិញ កម្មករ រោងចក្រនេះ បានមកតវ៉ានិងដាក់ពាក្យបណ្ដឹង ទៅក្រសួងការងារ។ ខណៈនោះមន្ត្រីក្រសួងស្កាត់មកសម្របសម្រួល ពាក់កណ្ដាលផ្លូវ ដោយសន្យាឱ្យថៅកែរោងចក្រចេញមុខដោះស្រាយ ប៉ុន្តែខាងរោងចក្រពេលនោះ មិនចេញមកជួបកម្មករភ្លាមៗឡើយ ដែលនាំកម្មករតវ៉ាជាថ្មីទៀតនៅថ្ងៃនេះ៕
