ប្រតិបត្តិការយោធាកងទ័ពជាតិអាហ្វហ្គានបានសម្លាប់ពួកសកម្មប្រយុទ្ធ ១០០ នាក់ និង៣៥នាក់ផ្សេងទៀតរងរបួស ។
យោងប្រភពព័ត៌មាន CNN ផ្សាយកាលពីថ្ងៃទី ១៣ ខែ កញ្ញា ឆ្នាំ២០១៥ ឲ្យដឹងថា កងទ័ពជាតិអាហ្វហ្គានីស្ថានបាននិយាយថា កងកម្លាំងរបស់ខ្លួនសម្លាប់សកម្មប្រយុទ្ធ ១០០ នាក់ក្នុងអំឡុងពេលប្រតិបត្ដិការយោធាជាច្រើនអនុវត្តនៅទូទាំងប្រទេសនៅចុងសប្ដាហ៍នេះ។
ក្រសួងការពារជាតិអាហ្វហ្គានីស្ថានឲ្យដឹងថា ប្រតិបត្ដិការនោះធ្វើឡើងនៅក្នុងខេត្តចំនួន ១១ នៃខេត្តទាំង៣៤របស់អាហ្វហ្គានីស្ថាន ដោយប្រើរយៈពេល ២៤ ម៉ោង ពីរសៀលថ្ងៃសៅរ៍ចូលទៅក្នុងថ្ងៃអាទិត្យម្សិលមិញ ។
ក្រសួងការពារជាតិអាហ្វហ្គានីស្ថាន បានចេញសេចក្ដីថ្លែងការណ៍ថា មានទាហានម្នាក់របស់កងទ័ពជាតិអាហ្វហ្គានបានស្លាប់នៅក្នុងការប្រយុទ្ធគ្នានោះ ។
សេចក្តីថ្លែងការណ៍នោះបានឱ្យដឹងបន្ថែមថា នៅក្នុងការប្រយុទ្ធនោះក្រុមឧទ្ទាមបានស្លាប់ ១០០ នាក់ហើយ ៣៥ នាក់ផ្សេងទៀតត្រូវបានរងរបួស និងត្រូវបានគេយកទៅឃុំឃាំង។ក្រុមទាហានជាតិអាហ្វហ្គានីស្ថានបាននិយាយថា កងកម្លាំងរបស់ខ្លួនបានកាន់កាប់សមរភូមិន30កន្លែង និងរឹបអូសកន្លែងលាក់សព្វាវុធ ព្រមទាំងគ្រាប់មីនផងដែរ ៕
